R. Suprapto (pahlawan revolusi)
Letnan Jenderal TNI Anumerta R. Suprapto (lair nang Purwokerto, Jawa Tengah tanggal 20 Juni 1920 - seda nang Lubangbuaya, Jakarta tanggal 1 Oktober 1965) klebu salah sijining pahlawan nasional Indonesia (pahlawan revolusi). Deweke dadi korbane peristiwa G30SPKI lan dimakamna nang Taman Makam Pahlawan Kalibata, Jakarta.
Suprapto sing laire nang Purwokerto kiye kena diomong meh seumuran karo Panglima Besar Sudirman. Umure mung kacek patang taun lewih enom sekang Panglima Besar. Pendidikan formale seuwise tamat MULO (setingkat SLTP) mlebu nang AMS (setingkat SMU) Bagian B nang Yogyakarta sing dirampungna deweke taun 1941.
Neng taun iku pemerintah Hindia Belanda ngumumna milisi jalaran pecahe Perang Donya II. Waktu kuwe R. Suprapto mlebu pendidikan militer Koninklijke Militaire Akademie nang Bandung. Pendidikan iki ora bisa dirampungna gutul tamat jalaran pasukan Jepang wis kadhung teka nang Indonesia. R. Suprapto banjur ditawan Jepang lan dilebokna penjara, ning deweke teyeng minggat.
Seuwise mlayu sekang penjara, deweke ngisi waktune kambi melu kursus Pusat Latian Pemuda, latian keibodan, seinendan, dan syuisyintai, terus kerja nang Kantor Pendidikan Masyarakat.
Jaman anyar-anyare kemerdekaan, R. Suprapto klebu salah sijine wong sing melu berjuang lan berhasil ngrebut senjatane pasukan Jepang nang Cilacap. Bar kuwe, deweke banjur mlebu dadi anggotane Tentara Keamanan Rakyat nang Purwokerto. Kuwe mau mula bukane deweke resmi mlebu dadi tentara, merga sedurunge walaupun deweke melu nglawan tentara Jepang nang Cilacap, tapi perjuangane kuwe mung sebates perjuangan rakyat sing umume dilakoni rakyat Indonesia.
Nang Tentara Keamanan Rakyat (TKR), R. Suprapto termasuk salah siji tentara sing melu nang pertempuran Ambarawa nglawan tentara Inggris. Waktu kuwe, pasukanne dipimpin langsung nang Panglima Besar Sudirman. R. Suprapto juga tau dadi ajudane Panglima Besar.
Seuwise Indonesia olih pengakuan kedaulatan, deweke sering pindah tugas. Pertama-tama deweke ditugasna dadi Kepala Staf Tentara lan Teritorial (T&T) IV/ Diponegoro nang Semarang. Sekang Semarang deweke ditarik nang Jakarta dadi Staf Angkatan Darat, terus maring Kementerian Pertahanan. Seuwise pemberontakan PRRI/Permesta sirep, deweke diangkat dadi Deputy Kepala Staf Angkatan Darat kanggo wilayah Sumatera sing markase nang Medan. Nang Medan tugase abot banget sebab kudu njaga ben pemberontakan kaya sedurunge ora kedadian maning.